കൊറോണ അങ്കിൾ ചൈനയിൽ നിന്ന് ദുഫായ് വഴി കൊച്ചിയിൽ വന്നിറങ്ങിയിട്ടുണ്ട്. തനി നാറിയാ. കണ്ണിൽ കണ്ടവനെ എല്ലാം വെടിവച്ചിടും. ഞാൻ ഹിന്ദുവാ ക്രിസ്ത്യനാ മുസൽമാനാ എന്നൊന്നും ഊറ്റം കൊണ്ട് മുമ്പിൽ ചെന്ന് നിന്നിട്ട് ഒരു കാര്യവുമില്ല. ഒരു മതവും കൊറവും ഇല്ലാത്ത തനി താന്തോന്നിയാ. മുന്നിൽ നിൽക്കുന്നത് മനുഷ്യ രൂപമാണോ എന്ന് മാത്രമേ നോക്കാറുള്ളു. മനുഷ്യ രൂപം കണ്ടാൽ കലിയിളകും.
വെള്ളം തളിച്ചാലും മുത്തെണ്ണിയാലും മുട്ടുകാലിൽ പ്രാർത്ഥിച്ചാലും ഒരു കാര്യവുമില്ല. അങ്കിൾ വെടിവച്ചിട്ടാൽ സ്വർഗത്തിൽ പോകാനും ചാൻസ് കുറവാണ്. മനുഷ്യമതിലിനും, രഥയാത്രയ്ക്കും ഒന്നും അങ്കിളിനെ തടുക്കാനുള്ള ശേഷി കുറവാണ്. അങ്കിൾ ചൈനീസ് പൗരനായത് കൊണ്ട്, പൗരത്വം കൊടുത്ത് ഒതുക്കിയേക്കാം എന്ന തീരുമാനത്തിനും വലിയ പ്രസക്തിയില്ല.
ഒറ്റ വഴിയേ ഉള്ളു, മതവും ജാതിയും വർഗ്ഗവും വർണവും മറന്ന് മാനം മര്യാദയ്ക്ക് ഒത്തൊരമയോടെ പ്രതിരോധത്തിന്റെ ഒരു മതിലു തീർത്താൽ ചിലപ്പോൾ അങ്കിളിനെ തിരിച്ച് വിമാനം കയറ്റി വിടാൻ ഒത്തേക്കും. അങ്കിൾ പാേയി കഴിഞ്ഞ് നമ്മുക്ക് പരസ്പരം ജാതിയും മതവും പറഞ്ഞ് കല്ലെറിയാൻ ഇഷ്ടം പോലെ സമയം കിടക്കുവല്ലേ. കഴിഞ്ഞ വർഷം പ്രളയ അമ്മായി ചിരവത്തടിയുമായി വന്നപ്പോൾ നമ്മൾ കവളൻ മടലുമായി ഓടിച്ചതും, അമ്മായി ഓടിക്കഴിഞ്ഞപ്പാേൾ, അതേ മടലുമായി നമ്മൾ പരസ്പരം തല്ലിത്തുടങ്ങിയതുമായ പാരമ്പര്യമുള്ളതുകൊണ്ട്, നമ്മുക്കിനി പുതിയൊരു പരിശീലനക്കളരിയുടെ ആവശ്യമുണ്ടന്ന് തോന്നുന്നില്ല. എന്നാ പിന്നെ തുടങ്ങുവല്ലേ....
ആ നിലവിളി ശബ്ദമിടോടോടോടോടോ.....
